З’яўленне кнігадрукавання ў сярэдзіне XV ст. кардынальна змяніла Еўропу. Дзякуючы новаму вынаходніцтву, стала магчыма неверагодна паскорыць пашырэнне інфармацыі, распаўсюд ідэй і ведаў. Адбылася першая медыяльная рэвалюцыя. 

Хто стаяў ля вытокаў кнігадруку? Дзе з’явілася першая друкаваная кніга, у Азіі ці ў Еўропе? Калі свет убачыў славянскі першадрук? 

На ўсе гэтыя пытанні мы паспрабуем пашукаць адказы разам у час трох заняткаў Аляксандра Паршанкова, з якіх распачынаецца восьмы сезон працы Віртуальнага Універсітэта. 

Мы ўбачым дзясяткі самых вядомых і цікавых еўрапейскіх старадрукаў, навучымся адрозніваць інкунабулы ад палеатыпаў, даведаемся, хто і чаму падаў у суд на Іагана Гутэнберга і пагартаем старонкі першай кнігі, надрукаванай на тэрыторыі сучаснай Беларусі. 

Курс пабудаваны на матэрыяле найноўшых еўрапейскіх даследаванняў! 

Заняткі будуць цікавыя аматарам еўрапейскай гісторыі, культуры і літаратуры любога ўзросту і ўзроўня падрыхтоўкі.

Аляксандр Паршанкоў

Дактарант Карлавага ўніверсітэта (Прага, Чэхія), выпускнік БДУ (Менск), магістр гістарычных навук. Даследніцкая дзейнасць Аляксандра прысвечана кірылічнай кнізе XVI-XVIII стст. і кніжнай культуры Вялікага Княства Літоўскага.

Калі?

21, 23 і 25 кастрычніка ў 19.00 па менскім часе (18.00 па Варшаве).

Дзе?

Zoom. Спасылка будзе дасланая на электронную пошту тых, хто заявіцца на ўдзел у занятках.

Як заявіцца?

Запоўніце да 20 кастрычніка форму заяўкі, пазначыўшы ў ёй актуальны адрас сваёй электроннай пошты.